Saha jalmana nu teu apal ka Sayidina Ali Bin Abi Thalib Karamallahu Wajhah. Hiji sahabat, misan sareng minantu Kanjeng Rosulullah SAW, mantena hiji pigur pamuda anu bisa dijieun toladan ku urang saréréa. Sabab Sayidina Ali mangrupikeun conto pamuda anu mibanda karaktér pamuda nu saéstuna. Ti umur masih kénéh alit Sayidina Ali geus wani ngayatakeun iman ka Allah sareng Rosul-Na.
Numatak wajar upami Sayidina Ali kantos masihan wejangan :
"Saéstuna pamuda nyaéta anu wani nyebutkeun ieu kaula, lain nu wani nyebutkeun ieu bapak kaula."
Hartina pamuda éta kudu teguh, pengkuh, percaya diri, gedé wawanén teu ngandelkeun nu jadi kolotna. Ibarat na aya hiji pamuda anu sombong pédah bapakna kasohor jugala raja duit, tuluy ngarasa jongjon embung usaha pédah kolotna beunghar raja kaya, tah éta lain ciri pamuda anu sajati. Tapi, pamuda anu sajati nyaéta pamuda anu pinuh ku cita-cita, daek neangan jati dirina, mandiri jeung teu jumawa ku kabeungharan kolotna sarta teu ngandelkeun kana kaboga kolotna.
Saha waé jalmana, salila acan bisa mandiri jeung can bisa nunjukeun ka khalayak umum "ieu kaula", maka saéstuna éta jalma can layak disebut pamuda.
Nyaritakeun pamuda lain waé nyaritakeun fisikna tapi ogé karakterna. Karakter nu kedah aya di pamuda :
1. Daék Diajar
2. Boga Impian, digawé, boga pamikiran jeung
tékad pikeun ngawujudkeun impianna
3. Rapékan, kreatif jeung inovatif
4. Percaya diri
Tah éta salah sawiosna hal anu kedah ngadarah daging di para pamuda pikeun ngawujudkeun pamuda anu boga tékad hadé pikeun kahadéan mangsa nu rék datang.
Mugia Manfaat, Amiin
Sukabumi, 28 Oktober 2019
Muhamad Sumardi Alif
0 Comments